Fleiri hafa verið andvígir inngöngu Íslands í Evrópusambandið en hlynntir samkvæmt niðurstöðum allra skoðanakannana sem birtar hafa verið hér á landi undanfarin tólf ár. Í Noregi hefur viðvarandi andstaða við inngöngu í sambandið verið enn lengur fyrir hendi eða allt frá 2005, í samfellt sextán ár.
Samkvæmt niðurstöðum nýjustu skoðanakönnunar MMR eru 46,4% landsmanna andvíg því að Ísland verði hluti af Evrópusambandinu en 28,2% því hlynnt. Sé aðeins miðað við þá sem taka afstöðu með eða á móti inngöngu eru 62% henni andvíg en 38% hlynnt. Á svipuðu róli hefur staðan verið undanfarin ár.
Talsvert meiri andstöðu var allajafna fyrir að fara á meðan unnið var að því að Ísland gengi í Evrópusambandið í tíð þáverandi ríkisstjórnar Samfylkingarinnar og Vinstrihreyfingarinnar – græns framboðs á árunum 2009-2013. Eftir að málið var tekið af dagskrá af nýrri ríkisstjórn dró hins vegar nokkuð úr henni.
Fram til ársins 2009, árið sem umsókn vinstristjórnarinnar um inngöngu í Evrópusambandið var komið á framfæri, höfðu skoðanakannanir ýmist sýnt fleiri hlynnta inngöngu eða fleiri andvíga henni. Síðan þá hafa hins vegar sem fyrr segir niðurstöður allra kannana sem birtar hafa verið sýnt fleiri andvíga.
Vaxandi umræða um samrunaskref í tengslum við Evrópusambandið hefur í gegnum tíðina haft ríka tilhneigingu til þess að leiða til aukinnar andstöðu við þau, bæði hér á Íslandi og erlendis, en komi til þess að innganga í sambandið verði aftur sett aftur á dagskrá hér á landi verður ekki komist hjá aukinni umræðu.
HJG
(Ljósmynd: Íslenzki fáninn. Eigandi: Hjörtur J. Guðmundsson)
Tengt efni:
„Þið vitið fullkomlega hvað er í pakkanum“
Sama gamla stefnan í grunninn
Frelsið til þess að ráða eigin málum