Fram kemur á fréttavef brezka dagblaðsins Daily Telegraph að stjórnvöld í Bretlandi hafi ákveðið að nýta nýfengið sjálfstæði landsins frá Evrópusambandinu til þess að draga verulega úr því regluverki sem í gildi er í landinu. Boris Johnson, forsætisráðherra Bretlands, hafi lagt blessun sína yfir áætlun í þeim efnum sem byggist á því að fyrir hverja reglugerð sem tekur gildi verði tvær aðrar óþarfar reglugerðir felldar niður.
Tengt efni: Vilja ekki ganga aftur í ESB
Rifjað er upp í fréttinni að ríkisstjórn Bretlands sem sat á árunum 2010-2015, og samanstóð af Íhaldsflokki Johnsons og Frjálslyndum demókrötum, hafi upphaflega kynnt regluna til sögunnar en vegna veru landsins í Evrópusambandinu á þeim tíma hafi hún aðeins náð til regluverks sem sett var af brezkum stjórnvöldum en ekki regluverks sem kom frá sambandinu. Nú sé hins vegar hægt að beita henni í báðum tilvikum.
Stjórnvöld í Bretlandi hafa einnig í hyggju samkvæmt fréttinni að flýta endurskoðun á nýju regluverki. Þannig verði lagt mat á reynsluna af því tveimur árum eftir að það tekur gildi í stað fimm í dag. Hvort það sé of íþyngjandi fyrir fyrirtæki og neytendur og hvort kostnaður vegna þess sé of mikill. Johnson er sagður vilja hrinda áætluninni í framkvæmd strax í haust í kjölfar samráðs við sérfræðinga, hagsmunaaðila og fleiri aðila.
Mögulegt að fella úr gildi óþarfa regluverk frá ESB
„Rétti tíminn er núna til þess að nútímavæða setningu regluverks samhliða því sem við náum okkur á strik á nýjan leik eftir kórónuveirufaraldurinn og grípum þau tækifæri sem fylgja því að vera sjálfstæð þjóð,“ er haft eftir ónafngreindum heimildarmanni innan brezku ríkisstjórnarinnar í fréttinni. Með útgöngu Bretlands úr Evrópusambandinu hafi skapast tækifæri til þess að auka samkeppnishæfni brezkt atvinnulífs.
„Það síðasta sem við viljum er að íþyngjandi regluverk standi í vegi fyrir nýsköpun og tækifærum í atvinnulífinu og fyrir vikið erum við að stefna að umfangsmiklum umbótum sem miða að því að losa okkur við óþarfa regluverk frá Evrópusambandinu og hrinda í framkvæmd metnaðarfullum áformum forsætisráðherrans um að Bretland verði í fremstu röð þegar kemur að nýsköpun á heimsvísu,“ er enn fremur haft eftir honum.
Tengt efni: Hraðbátarnir og olíuskipið
Vitnað er í fréttinni í skýrslu vinnuhóps stjórnvalda um nýsköpun, hagvöxt og umbætur í setningu regluverks þess efnis að í kjölfar útgöngu Bretlands úr Evrópusambandinu verði í auknum mæli hægt að setja reglur sem endurspegli hagsmuni brezku þjóðarinnar í stað þess að ákvarðanir í þeim efnum séu háðar langdregnum viðræðum og málamiðlunum við 27 önnur ríki líkt og verið hafi raunin innan sambandsins.
(Ljósmynd: Boris Johnson, forsætisráðherra Bretlands. Eigandi: EU2016 SK – Wikimedia Commons)