Mikilvægt er að Seðlabanki Evrópusambandsins nái tökum á viðvarandi verðbólgu á evrusvæðinu að sögn Joachims Nagel, nýs bankastjóra þýzka seðlabankans, en verðbólga fór í 5,3% í Þýzkalandi í desember og hefur ekki verið meiri frá því í júní 1992. Brezka dagblaðið Daily Telegraph fjallaði um málið í gær.
Fram kemur að vaxandi óánægju gæti í Þýzkalandi með neikvæða stýrivexta Seðlabanka Evrópusambandsins, sem verið hafi við líði á evrusvæðinu í hátt í áratug, sem og peningaprentunar bankans upp á 1,85 milljarða evra (um 273 milljarða króna) til þess að bregðast við afleiðingum kórónuveirufaraldursins.
Verðbólgan aukizt umfram spár hagfræðinga
Verðbólga á evrusvæðinu mælist 5% en verðbólgumarkmið Seðlabanka Evrópusambandsins er 2%. Fram kemur í fréttinni að bankinn hafi slakað á peningastefnu sinni á síðasta ári í því skyni að skapa sveigjanleika til þess að takast á við faraldurinn en verðbólgan hafi aukizt umfram spár hagfræðinga.
„Ég sé fram á vaxandi hættu á því að verðbólga verði áfram há og í lengri tíma en verið er að gera ráð fyrir. Í öllu falli verða þeir sem marka stefnuna að vera á varðbergi,“ segir Nagel. Seðlabanki Evrópusambandsins verði að gera það sem þurfi til þess að varðveita verðstöðugleika. Trúverðugleiki hans sé í húfi.
„Almenningur hefur mun minna fé á milli handanna. Margir eru skiljanlega áhyggjufullir yfir því að hafa orðið af þessum kaupmætti – mjög áhyggjufullir,“ er enn fremur haft eftir Nagel en um er að ræða fyrstu opinberu ummæli hans eftir að hann tók við embætti seðlabankastjóra að því er segir í fréttinni.
Vextir hækkaðir ofan í efnahagslega stöðnun?
Vaxandi verðbólga á evrusvæðinu stafar einkum af hækkandi verðlagi á orku, einkum gasi, og matvælum. Vonir Seðlabanka Evrópusambandsins standa til þess að verðbólgan hafi náð hámarki og ekki þurfi að hækka vexti sem verið hafa neikvæðir einkum vegna viðvarandi efnahagsstöðnunar í lykilríkjum evrusvæðisins.
Komi til þess að hækka verði stýrivexti seðlabankans til þess að slá á verðbólguna mun það að öllum líkindum hægja enn frekar á hjólum atvinnulífsins á evrusvæðinu ofan í þá efnahagslegu stöðnun sem ríkt hefur víða innan þess um árabil. Ekki sízt í Þýzkalandi. Þá sviðsmynd vill bankinn fyrir alla muni forðast.
(Ljósmynd: Evruseðlar og -mynt. Eigandi: Avij)