„Mér finnst ég gera lítið annað á þinginu en að innleiða einhverjar reglur frá Evrópusambandinu,“ sagði Brynjar Níelsson, hæstaréttarlögmaður og þáverandi þingmaður Sjálfstæðisflokksins, í Bítinu á Bylgjunni 3. febrúar 2014. Þingmenn væru jafnvel að innleiða meira en þyrfti að gera vegna þess að ekki væri fyrir að fara nógu mörgum opinberum starfsmönnum til þess að fylgjast með málum.
„Vitum ekkert hvað við erum að gera“
„Það er svo dýrt, aðgöngumiðinn að þessum innri markaði er rándýr fyrir okkur,“ sagði Brynjar enn fremur. Fyrir vikið hefði hann velt því fyrir sér hvort hugsanlega væri ástæða til þess að endurskoða EES-samninginn. Spurður hvort hann kynnti sér vel regluverkið frá sambandinu og hvort þingmenn næðu alveg utan um það allt sagði Brynjar: „Nei, nei nei. Auðvitað vitum við ekkert hvað við erum að gera, fæst okkar held ég.“ Skilaboðin væru einfaldlega þau að þetta væri regluverkið sem þingmenn ættu að innleiða.
„Það eru alls konar hlutir í þessum samningi sem ég hef aldrei skilið af hverju við þurfum að fara eftir regluverki þeirra [ESB] með. Mér finnst það ekki einu sinni tengjast þessum innri markaði í raun. En þetta er bara eitthvað sem hefur gerzt og maður einhvern veginn situr með þetta í fanginu og veit ekki sitt rjúkandi ráð.“
„Það er alltaf gengið lengra og lengra“
Brynjar ræddi einnig til að mynda um EES-samninginn í þættinum Þingvöllum á útvarpsstöðinni K100 11. nóvember 2018 og lýsti þar ágætlega eðli og þróun samningsins til þessa:
„Þetta er vandinn við þennan samning. Það sem gerist alltaf er að það er alltaf gengið lengra og lengra. Framsalið á valdinu verður alltaf meira og meira. Þá er spurningin: Eigum við alltaf að teygja okkur lengra í þessa átt eða eigum við að spyrna niður fæti og segja: „Þetta er orðið eitthvað of mikið“?“
Frá því að þessi orð voru látin falla, fyrir annars vegar að verða átta árum og hins vegar fyrir rúmum þremur árum síðan, er ljóst að staðan hefur gert lítið annað en að versna í þessum efnum.
Meira regluverk og minni sveigjanleiki
Birgir Ármannsson, forseti Alþingis og þingmaður Sjálfstæðisflokksins, kom inn á þetta á dögunum í útvarpsþættinum Í leit að sannleikanum á Útvarpi Sögu þar sem hann benti meðal annars á það að regluverk frá Evrópusambandinu, sem Íslendingar tækju upp í gegnum aðild Íslands að EES-samningnum, hefði farið vaxandi á liðnum árum á sama tíma og gildissvið samningsins hefði teygst út til fleiri málaflokka. Þá hefði sá sveigjanleiki, sem áður hefði verið fyrir að fara í regluverkinu, farið minnkandi.
HJG
(Ljósmynd: Höfuðstöðvar framkvæmdastjórnar Evrópusambandsins í Brussel. Eigandi: Romaine – Wikimedia Commons)
Tengt efni:
Meira regluverk og minna svigrúm
Hagstæðara að sigla undir brezkum fána
Telja norræna vinnumarkaðsmódelinu ógnað
Fullveldi og lýðræði haldast í hendur
Reglur ESB víki fyrir norskum lögum